تدوينات قادمة

مستقبل العلاقة بين الإخوان والنظام

التنظيم الدولي للإخوان

شبابنا علي المنتديات

خواطر مسافر

استكمال ذكريات العمل الطلابي

قطار الدعوة وقطار الحياة

بأي حال عدت يا عيد ؟؟

اجتمعت الأمة بالملايين علي عرفة لكن لم تجتمع قلوبهم ولا كلمتهم علي نصرة قضايانا المصيرية فرح الناس بالعيد ونحن معهم لكنها فرحة منقوصة عساها تكتمل

وحشتينى يا مصر





... وحشتينى يا مصر


فعلا وحشتينى....وربنا يسامح اللي حرمونى منك...لم اكن أعرف أنى أحبك كل هذا الحب

( !!!!!!!!! ولولا أن أهلك أخرجونى منك...... ما خرجت


هكذا عند أذان الفجر تذكرت قول الرسول الكريم صلى الله عليه وسلم وهو مجبر على الخروج من مكه مهاجرا
ودعوت ان أعود كما عاد فاتحا منتصرا...


ونصر المرحله هو إنى أرجع مصر فأجد البلد عايشه فى حريه وأمن وأهلها فى رخاء أو على الأقل كل واحد بيسعى وربنا بيرزقه بعيدا عن الفساد والرشوه والمحسوبيه وخراب الذمم

  • وحشتينى يا مصر


  • وحشنى فيك رمضان ومظاهر البهجه فيه وصلاة التراويح والتهجد


  • -اللى الظلمه فاكرين إنهم هيقدروا يمنعوها) ناس عبيطه فعلا متخيلين إنهم يقدروا يحاربوا الدين ويقفوا أمام ربنا وهم أهون من أن يقفوا أمام عبد مسئول لكن تقول إيه ...أيامهم قربت وهذه حلاوة روح

  • وحشنى فيك الشوارع الخاليه ساعة المغرب والشباب اللى منتشر على نواصى الشوارع وفى الميادين بيفطر الناس المارين فى الطريق

  • وحشنى فيك المسحراتى اللى لسه مصمم على اللف على الأبواب لإيقاظ الناس للسحور....
  • والله فعلا وحشتينى
  • ووحشتونى يا أهل مصر
    وحشنى أبى وأمى جدا وانا داخل عليهم أزورهم وأقعد معاهم ولو وقت قليل زى ما كانوا دايما يشتكوا لى(يا إبنى اقعد معانا شويه)وأنا أقول لهم المهم إن إحنا نسعد فى الشويه الصغيرين اللى قاعدينهم سوا وبالكتير ساعه وتلاقينى نزلت ازور هذا وذاك


  • وحشني حماي الحاج ربيع وهو منتظرني في الليل متأخر نتعشي سوا وأسأله عن أخبار الكرة والجرايد

  • ووحشتني حماتي ماما كما أحب أن أناديها وقعدة بعد الفجر نتكلم ونقرأ قرآن وبعدين تقوم تعمل لي مشروب
    وحشنى زيارة السعدنى وتبادل أطراف الحديث والاخبار ووحشنى جلسة التناصح مع د.محيى وحديث الدعوه ووحشنى الإخوان كل الإخوان

  • لكن أقول إيه
    محنه وهتزول ونرجع تانى أحسن من الأول نتجالس ونتناصح ونفرح.....أنا فعلا متفائل جدا ومتأكد إن ربنا هيفتحها علينا من أوسع أبوابه المهم نصبر ونثبت ونعمل بدون توقف والله المستعان


  • إن مع العسر يسرا....إن مع العسر يسرا وما غلب عسر يسرين
    وحشتينى يا مصر

أول الحكاية

بسم الله الرحمن الرحيم


الحمد لله والصلاة والسلام علي رسول الله

في البداية ليسمح لي أصدقائي وأحبابي في أن أتحدث إليهم بلغة جديدة ربما لم يعتادوها مني ورأيتها هي لغة المدونين والشباب عموما وهم أحد أهم الفئات التي أريد التواصل معها من خلال مدونتي




أصل الحكاية


  • تابعت لفترة طويلة المدونات والمدونين وعجبتني الفكرة جدا لأسباب كثيرة منها


  • أنها تعبير صادق ومباشر عن الشخص ومشاعره وآراؤه


  • أنها ساحة تفاعيلة وفضاء خصب لتبادل الآراء ووجهات النظر في القضايا العامة والخاصة



  • أنها أصبحت تمثل أحد أبرز وأنجح الوسائل الإعلامية والتعبيرية حاليا



  • أنها غدت تمثل وسيلة ضغط مباشر وغير قابلة للتوقف من الأنظمة الديكتاتورية العربية

ولما الحكاية عجبتني فكرت من فترة طويلة أدون ولكن وجدت صعوبات كثيرة لأبدأ منها


أكذوبة ضيق الوقت وكثرة الإنشغال


    قدرتي علي مجاراة لغة المدونين اللي باحاول أعملها الآن وأنا باكتب لكن الطبع غلاب لأني من عشاق اللغة العربية كتابة ثم تحدثا وكمان باختار ألفاظ ومرادفات أحيانا تبدو مكلكعه وده مش هينفع غالبا مع المدونين


    المدونة تعكس شخصية المدون وتعبر عن مشاعره وأنا لم أتعود علي ذلك لدرجة إن زوجتي مثلا متعرفش كثير من أحاسيسي تجاه المواقف وبعض الناس وأحيانا تجاهها وأنا عارف إنها زي كثير من اللي يعرفوني هيصدموا بالكلام ده لكنه فعلا قراءة للنفس ومحاولة للتغيير والتعبير الصادق فمثلا

    مين يتخيل إني باحب حماتي جداااااااااااااااا

    ومع ذلك عمري ما قلت لها إني باحبها !!!


وهي في منزلة أمي بالضبط لكن ربما تكون دي البداية

أما إزاي هأدون فهذا

بفضل الله أولا

ثم

بتشجيع زوجتي

واستحسان مجدي.... وتصميمات حازم

والثلاثة تحديدا منتظر منهم الكثير في الدعم والمساعدة والنصح والتعليق وقبلهم الدعاء

هتضيف إيه؟؟

ده سؤال سألته لنفسي قبل ما أبدأ التدوين وكانت الإجابة كالآتي

  1. هأضيف لنفسي إنشاء الله القدرة علي التعبيربالمشاعر تجاه الآخرين- باب شخصي
  2. هأحاول أسترجع بعض الذكريات المهمة والأحداث اللي مريت بيها خاصة في فترة العمل الدعوي والجامعي- باب من الذاكرة

  3. هأسجل آرائي تجاه بعض الموضوعات والأحداث الجارية - باب من قلب الأحداث

  4. هأجتهد في تقديم بعض الكتابات والنصائح لأحبابي الشباب- باب مع الشباب

  5. أحيانا بتكون لي آراء تربوية أو تعجبني مواقف أو باعترض علي ممارسات فهاسجلها - باب تربويات

المهم إني هابدأ وأدون وكلي أمل في التفاعل معي بالنصح والتصويب والتعليق وانجاح المبادرات أو الاقتراحات وبادع محدش يزعل مني ولا أسيئ لحد

والله المستعان



ويمكن تكون دي من فوائد الغربه



وللتواصل يمكن مراسلتي علي



aatty1@gmail.com